GENSAN- Gikumpirma ni Gensan Lone District Representative Shirlyn Bañas-Nograles ang ₱250 milyong nga commitment sa Department of Transportation o DOTr alang sa rehabilitasyon ug pagpalambo sa General Santos International Airport.
Matud niya, personal siyang nakigsulti kang DOTr Secretary Giovanni Z. Lopez human sa budget hearing aron masiguro ang padayon nga pagpatuman sa proyekto.
Lakip sa prayoridad ang pagkompleto sa second floor sa terminal sa dili pa matapos ang Nobyembre o sa unang semana sa Disyembre, ilabina sa pag-atubang sa holiday rush.
Giplano usab ang pagpalit o pagdugang og boarding bridge nga mahimong mag-accommodate sa dagkong international flights sama sa Airbus A330.
Lakip usab sa mga lakang ang pag-ilis sa mga nadaot nga bungbong sa terminal gamit ang mas lig-on nga tempered glass aron mas mahimo kining luwas batok sa linog ug uban pang kalamidad.
Dugang pa ni Bañas-Nograles, iyang padayong tutukan uban sa DOTr ug Civil Aviation Authority of the Philippines ang rehabilitasyon isip bahin sa iyang House Bill No. 269 nga nagtumong sa pagtukod sa General Santos City International Airport Authority ug paghimo sa airport nga world-class hub alang sa negosyo, turismo, logistics ug pamuhunan.
