GENSAN- Nabutyag ang seryosong isyu sa pinansyal sa South Cotabato II Electric Cooperative, Inc. (SOCOTECO II) human sa usa ka external audit nga nagpakita og kapin ₱1.8 bilyon nga disbursement nga wala’y klarong dokumento o sapat nga rekord.
Gipadayag kini ni Councilor Dominador Lagare III atol sa regular session sa City Council niadtong Marso 24, 2026, diin iyang giingong dako kini nga kabalaka sa transparency ug accountability sa kooperatiba.
Sumala sa report, ang kantidad naglangkob sa ₱886,739,000 alang sa 2023 ug ₱939,790,000 alang sa 2024.
Giila ni SOCOTECO II Board President Patrick Yap ang maong audit apan wala siya naghatag og dugang detalye ug gitumong ang pangutana sa ilang finance manager.
Tungod niini, gipangayo ni Lagare ang usa ka sinulat nga tubag ug gi-awhag ang mga ahensya sama sa National Electrification Administration ug Energy Regulatory Commission nga mosalmot sa imbestigasyon aron masuta ang tinuod nga kahimtang.
Samtang nagpadayon ang imbestigasyon, naghulat ang kapin 200,000 ka member-consumer-owners sa SocSarGen og klarong tubag bahin sa maong kontrobersiya.
